Skýrsla verður tekin í dag af ökumanninum sem var handtekinn í gærkvöldi eftir að lögreglan veitti honum eftirför í Voga- og Laugarneshverfi.
„Það þarf að taka skýrslu af honum í morgunsárið og spyrja hann út í þetta,” segir Ásmundur Rúnar Gylfason, aðstoðaryfirlögregluþjónn hjá lögreglunni á höfuðborgarsvæðinu, spurður hvort maðurinn sé enn í haldi.
Maðurinn, sem er á fimmtugsaldri, er grunaður um akstur undir áhrifum áfengis og fíkniefna og hefur hann áður komið við sögu hjá lögreglunni. Ók hann á ofsahraða um vistgötur.
„Það stafaði mikil hætta af háttsemi þessa einstaklings og var mikil mildi að ekki fór verr,” segir Ásmundur Rúnar. „Við lítum þetta alvarlegum augum.”