FKA Framtíð stóð fyrir verkefni í vetur sem á að styrkja konur á vinnumarkaði. Sólveig R. Gunnarsdóttir formaður félagsins segir að metþátttaka hafi verið, en 160 konur sóttu það. Íslenskar konur lærðu af reynslumiklum leiðtogum með það markmið að eflast í starfi. 

Á dögunum var haldið sérstakt lokahóf á Fosshótel Reykjavík. Eliza Reid, eiginkona Guðna Th. Jóhannessonar forseta Íslands, ávarpaði hópinn og hvatti konur til þess að vera óhræddar við að stíga út fyrir boxið og takast á við nýjar áskoranir - bæði í einkalífi og starfi. 

Ása Karín Hólm, stjórnunarráðgjafi hjá Stratagem ráðgjöf, var verndari mentorverkefnisins í vetur. Hún hefur stýrt verkefninu í vetur með fræðslufundum og voru hennar skilaboð til kvenna að þær ættu að taka pláss.

Alls tóku 160 konur þátt í verkefninu. 

„Mentorverkefnið er klárlega verkefni sem komið er til að vera. Við stefnum á meiri vöxt og höldum áfram að þróa verkefnið til að leiða saman öflugar konur þvert á atvinnulífið. Verkefnið hefur vakið athygli innan atvinnulífsins og við höfum fregnir að því að fyrirtæki séu að taka upp mentorverkefni innanhús í kjölfar þátttöku kvenna hjá okkur. Það er ómetanlegt fyrir ungar konur, sem eru að stíga sín fyrstu skref eða eru komnar í stjórnendastöður og vilja taka skrefið enn hærra, að geta leitað til öflugra leiðtoga um leiðir til árangurs. Ég hef verið lánsöm að hafa fengið frábæra mentora í gegnum verkefnið Guðbjörgu Önnu Guðmundsdóttur í áhættustýringu Indó, Lindu Jónsdóttur fjármálastjóra SideKick Health, Tanyu Zharov aðstoðarforstjóra Alvotech sem hafa gefið mér ómetanleg ráð,innblástur og hvatningu og er ég þeim ævinlega þakklát,“ segir Sólveig R. Gunnarsdóttir formaður FKA Framtíðar. Hún nefnir að það sé aðalfundur hjá félaginu 30. maí og það séu fjögur sæti laus í stjórn félagsins. 

„Þær sem vilja halda áfram að byggja upp deildina, vaxa og efla tengslanetið sitt eru hvattar til að hafa samband, bjóða sig fram og rétta upp hönd,“ segir Sólveig.