Norn leidd að báli á Hólmavík

Norn var leidd að báli á Hólmavík í gærkvöldi. Um var að ræða viðburð sem nefnist Frelsun nornarinnar og er hluti af lista- og menningarhátíðinni Galdrafár á Ströndum.

Frétt af mbl.is

„Þetta verður mikilfenglegur viðburður“

Nornin var leidd í fjötrum í skrúðgöngu frá Bragganum og niður á strönd. Þar var hún leyst úr böndunum og kveikti hún sjálf í báli.

mbl.is/Árni Sæberg

Galdrar og fornnorræn menning

„Þetta er lista- og menningarhátíð með flúrum, fyrirlestrum, tónlist, markaði, blóti og brennu og alls konar skemmtilegu,“ segir Hrafnhildur Inga Guðjónsdóttir, forsvarsmaður hátíðarinnar.

Þema hátíðarinnar er galdrar og fornnorræn menning. Á þriðja hundrað manns sóttu hátíðina í gær, að sögn Hrafnhildar.

mbl.is/Árni Sæberg

Hátíðin er haldin í samstarfi við galdrasafnið á Hólmavík sem nefnist Galdrasýning á Ströndum, og einnig í samstarfi við Galdur brugghús á Hólmavík.

Hátíðin er haldin í fyrsta sinn núna um helgina, en Hrafnhildur segir að mikill vilji sé til þess að halda hana árlega héðan í frá.

Hrafnhildur Inga Guðjónsdóttir. mbl.is/Árni Sæberg

Víkingaþorp í bænum

Um hátíðina stendur á Facebook-viðburði hátíðarinnar: 

„Gestir fá að ganga um lítið víkingaþorp, taka þátt í vinnustofum, heimsækja Galdrasýningu á Ströndum og læra um sögu galdra, hlusta á dáleiðandi tónlist og sækja fræðslur um hina ýmsu fornnorrænu siði sem tóku þátt í að skapa hið yfirnáttúrulega ívaf sem gerir Ísland svo heillandi og vafið dulúð.“

Vefur hátíðarinnar

• Blogga um frétt