París SG tryggði sér um helgina franska meistaratitilinn í knattspyrnu karla. Það varð ljóst þegar Monaco, sem er í öðru sæti, tapaði 3:2 fyrir Lyon í gær.
PSG hefur nú alls orðið Frakklandsmeistari tólf sinnum, þar af tíu sinnum á síðustu tólf tímabilum.
PSG gerði jafntefli gegn Le Havre, 3:3, á laugardag en hefði með sigri tryggt sér titilinn.
Jafnteflið kom ekki að sök þar sem Parísarliðið er með 12 stiga forskot á Monaco þegar aðeins þrjár umferðir eru óleiknar.